Një mirëpritje e kujdesshme për strategjinë e re të KE-së lidhur me Software-in e Lirë
Komisioni Europian ka botuar një version të ri të strategjisë së vet për përdorimin e brendshëm të Software-it të Lirë. Tani strategjia mbulon periudhën 2014-2017. Gjatë procesit të përditësimit, FSFE-ja ka dhënë gjerësisht për Komisionin mendimet e veta.
Teksa strategjia është përgjithësisht e ngjashme me versionin e mëparshëm, ka një numër përmirësimesh të dukshme:
Një qëndrim më i vendosur ndaj Software-it të Lirë. Për strategjinë, kjo është një domosdoshmëri minimum për të patur të paktën njëfarë ndikimi në një mjedis ku software-i pronësor është i rrënjosur thellësisht. Strategjia e re bën fjalë për krijim "mundësish të barabarta" për Software-in e Lirë, dhe për t’i dhënë atij "vëmendje aktive dhe të paanshme".
Një qëndrim ndaj Standardeve të Hapura që shkon tej rishikimit të holluar të Kuadrit Europian Për Ndërveprueshmëri: "Komisioni duhet të promovojë përdorimin e produkteve që përkrahin specifikime teknike të mirëpranuara, të mirëdokumentuara dhe mundësisht të hapura, që mund të adoptohen, sendërtohen dhe zgjerohen lirisht".
Një angazhim për ta bërë më të lehtë për programuesit e Komisionit të marrin pjesë në bashkësi Software-i të Lirë jashtë tij.
"Ky dokument është në thelb një deklaratë qëndrimesh nga ana e Komisionit," shprehet presidenti i FSFE-së, Karsten Gerloff. "Ka mjaft akte që mund të ndërmarrë Komisioni për të përfituar nga përparësitë që ofrojnë Software-i i Lirë dhe Standardet e Hapura - praktikat e prokurimit, sa për të përmendur një. Tej këtyre, strategjia e re përfaqëson një ndryshim për mirë, dhe jemi të gëzuar tek shohim Komisionin të ecë në drejtimin e duhur."
Shumë i rëndësishëm është fakti që strategjia shoqërohet nga një plan veprimesh që synon vënien e saj në jetë, ndryshe nga versionet e mëparshëm. Sidoqoftë, plani i veprimeve nuk është publik, ndaj s’është e mundur të vlerësohet ecuria e Komisionit drejt synimeve të veta. FSFE-ja shpreson që Komisioni një ditë do ta botojë planin e veprimeve.