Që të punojë për Software-in e Lirë gjatë 2016-s, FSFE-ja ka nevojë për dhurimet tuaja
Shumë individë dhe kompani në shoqërinë tonë përfitojnë nga Software-i i Lirë. Që prej 2001-shit Free Software Foundation Europe i fuqizon njerëzit të kontrollojnë teknologjinë. Që me punën tonë të arrijmë diçka, synojmë 140 000€ dhurime, deri më 31 janar, nga të cilat kemi marrë tashmë 60 000€.
Ju lutemi, na ndihmoni të vazhdojmë punën tonë për Software-in e Lirë duke dhuruar sot:
- Si individ, ju lutemi, na përkrahni duke u bërë anëtar mbështetës i FSFE-së (shuma mesatare për anëtarë mbështetës është 125€/v).
- Si kompani, ju lutemi, na përkrahni me një dhurim. Mund të bëheni dhurues i artë për 1000€/muaj, dhurues i argjendtë për 200€/muaj, ose dhurues i bronztë për 40€/muaj.
Dhuruesit tanë na bënë të mundur të arrijmë sukseset vijuese:
- Mbyllëm fushatën tonë gjashtëvjeçare PDFreaders, pasi bindëm 1125 administrata publike të heqin nga sajtet e tyre reklamat për software pronësor.
- Ndihmuam t’u jepet fund rrugëzuesve të detyruar në Gjermani me një ligj që u siguron përdoruesve lirinë të përdorin rrugëzuesin e tyre me Software të lirë. Kjo do të duhej të shërbente si shembull nëpër Europë, dhe do të përkrahim ligjshmëri të ngjashme kudo që të jetë nevoja.
- Jemi aktivë në politikat e BE-së: vlerësimi ynë për Strategjinë për një Treg të Përbashkët Dixhital u prit mirë dhe presim që të tjera institucione të BE-së të ndjekin rekomandimet tona.
- Mesatarisht dërgojmë një paketë promocionale në ditë. Përkrahësit tanë përdorin material shumëgjuhësh për të informuar më shumë njerëz rreth lirisë së software-it në kompanitë, universitetet, shkollat e tyre, në biblioteka dhe kafe, apo në stenda informative.
Për vitin tjetër duam të përqendrohemi te ushtrimi i trysnisë lidhur me kërkesat tona që krejt software-i i financuar me paranë publike të botohet si Software i Lirë, dhe për të drejtën e gjithkujt për të eksperimentuar me hardware-in dhe software-in e tyre.
Për të arritur këto synime:
- do të ofrojmë ndihmë për vullnetarët e fushatave tonë që të shtojnë efektshmërinë e tyre, dhe do t’i pajisim me një larmi më të madhe materiali promocional; dhe
- do të fillojmë bashkërendimin mes grupesh të Software-it të Lirë që janë aktivë në probleme politikash në BE.
Veç kësaj, do të vazhdojmë përpjekjet tona të tanishme për të hequr pengesat ndaj lirisë së software-it dhe të nxisim njerëzit të përdorin dhe zhvillojnë Software të Lirë. Një veprimtari thelbësore mbetet udhëheqja e kompanive për kalimin në Software të Lirë, duke ndihmuar degët e tyre ligjore të kuptojnë licencat e Software-it të Lirë.
Sfidat janë në rritje: traktate ndërkombëtare opake dhe procese komplekse politikash kërkojnë trajtime të kujdesshme që të punohet me efektshmëri për lirinë e software-it. Është e nevojshme që të jemi në gjendje të ndjekim si duhet zhvillime të tilla.
Ja pse përkrahja juaj është kyçe për ne. Ndaj, ju lutemi, na ndihmoni duke u bërë një anëtar mbështetës ose përmes një dhurimi korporate.