Buletin

Buletini i FSFE-së – janar 2014

Nga Festa e Julit në Dimër të Plotë

Mjaft hackers (përfshi ne, sigurisht!) dëfryen në festimet e ndryshme të zhvilluara gjatë solsticit të dimrit. Por ja që koha për të vrarë mendjen me dhuratat e Krishtlindjeve dhe për të shijuar përhumbjen në gjirin e familjes mbaroi – Juli iku, viti u ripërtëri, dhe beteja për lirinë dhe çlirimin kërkon sërish vëmendjen tonë. Ndaj, ia vlen të fillohet me një përmbledhje të shkurtër të atyre që sjell për ne 2014 gjatë muajve të parë.

Ata që pëlqejnë kremtimet do të duhej ta kishin tashmë mendjen te 14 shkurti, rasti i përvitshëm kur sajti bëhet rozë dhe përmbytet nga zemra, dhe koha e përkryer për t’u dhënë një përqafim programuesve dhe për të afruar të dashurit tuaj me Software-in e Lirë dhe Anëtarësimin Shok.

Atyre që u pëlqejnë më shumë gjërat praktike, do t’u duhet të presin deri nga fundi i marsit, që të edukojnë bashkëqytetarët rreth Standardeve të Hapura. Sidoqoftë, nuk ka pse të dëshpëroheni: fushatat aktive tona kanë përherë nevojë për veprimtarë të rinj. Është e lehtë të lidheni!

Dhe meqë jemi në temë, gjatë vitit do të ketë mjaft raste për t’u takuar me stafin, vullnetarë dhe Anëtarë Shok tanët. Sa për t’ia filluar, FSFE-ja do të jetë e pranishme me një stendë në konferencën e Software-it të Lirë, FOSDEM, që mbahet javën e parë të shkurtit në Bruksel. Cilido që pëlqen bisedat, apo që po i mbarohen gjërat e lirisë do të duhej të bënte një xhiro andej. Ata që nuk vijnë dot në FOSDEM këtë vit, do të duhej, me raste, t’i hidhnin një sy ndarjes mbi veprimtaritë, te sajti ynë për mundësi takimi me ne në të ardhmen.

DIY përkundër Administrim Dixhital Kufizimesh

Ndërkohë që jemi të sigurt se mjaft nga lexuesit tanë ose patën fat, ose e ngritën mjaft zërin për të marrë vetëm dhurata Krishtlindjeje që respektojnë lirinë e tyre, ka ndoshta ca që e shohin veten në zotërim objektesh që as qenë krijuar nga dhuruesi, as shihen gjëkundi te Udhërrëfyes Dhurimesh Festash të organizmit tonë vëlla.

Kemi ndoca rekomandime për trajtimin e këtyre dhuratave: ca prej tyre mund të çlirohen (p.sh., pajisjet Android); ka shumë gjasa që zhvillues që punojnë për krijimin e zëvendësimeve të lira për sisteme të ndryshme pronësore ta pëlqejnë dhurimin në hardware (kërkoni në web për përpjekje të ndryshme për çlirimin e kategorive të ndryshme të pajisjeve); dhe së fundi, mund të jeni në gjendje ta bëni vetë një dhuratë të tillë të xhirojë Software të Lirë.

Çfarëdo të keni vendosur të bëni me këto sende, do të donim të na bënit të ditur zgjidhjet tuaja. Lidhur me temën kemi hapur një rrjedhë te lista e postimeve, dhe email-et te discussion@lists.fsfe.org janë të mirëpritur (ju lutemi, kini parasysh që kjo është një listë publike postimesh). Përveç zgjidhjeve për dhurata jo të lira, jemi gjithashtu në kërkim të lajmeve për dhurata që e respektojnë lirinë ose DIY me të cilat po zbaviteni vërtet.

Diçka Krejt Tjetër

• Ky buletin, që prej dhjetorit 2013, del rregullisht në Rumanisht. Shoqata bashkëpunëtore Fundația Ceata ka marrë përsipër ofrimin në kohë të përkthimeve, gjë për të cilin i jemi tej mase mirënjohës.
• Nga grumbullimet planet:
• Ish-nënpresidenti ynë, Henrik Sandklef, ka qenë i zënë me shtimin e mbulimit të LCD-ve nga Searduino. Postimi i tij i fundit (jo te planeti) shërben gjithaq edhe si një thirrje për kontribute.
• Isabel Drost-Fromm, në ‘On geeks growing up’ sodit domethënien e jetës, ose për ta thënë më thjesht, sa të afërta janë për familjen një numër konferencash mbi teknologjinë. Modelet pozitive të zgjedhura prej Izabelës i kanë hak ca fjalë inkurajimi, dhe vetë Izabelës nuk kemi ç’t’i themi tjetër veç se shumë e goditur Anësia Induktive!
• Guido Arnold, Bashkërenduesi i ekipit të Arsimit, ka grumbulluar dhe përmbledhur lajmet e nëntorit mbi Software-in e Lirë në arsim.
• Daniel Pocock ka shkruar mjaft rreth thirrjesh WebRTC (‘të lira, prej shfletuesi drejt një celulari, me software të lirë’, ‘Bëjeni WebRTC-në të xhirojë më shpejt’, ‘xWiki: 10 vjet dhe një rast i suksesshëm WebRTC-je’).
• Paul Boddie ka bërë të njëjtën gjë për Kolab-in (‘Aventura me Paketimin Kolab dhe pykolab’, ‘Integrimi i setup-kolab-it me Paketimet Debian’).
• Gjëja e fundit nga planeti që siguroi përmendje nderuese te buletini nën këtë redaktim të përkohshëm është ‘OpenPGP and S/MIME or Trust and “Trust”’ nga Jens Lechtenbörger. Jensi shpjegon pse për fshehtëzim email-esh do të duhej parapëlqyer OpenPGP-ja, në vend se S/MIME. Njohja me shpjegimin është shumë e këshillueshme për cilindo që përdor, ose kundron përdorimin e fshehtëzimit të email-eve.
• Repentinus, një nga dy përfaqësuesit tanë të Anëtarësisë Shok, këtë dimër po e mban zverkun ngrohtë me një shall leshi të gjelbër dhe të zi, me motive stemën Fellowship Plussy dhe shkronjat "FSFE". Ata lexues tanët që dinë të thurin, mund të bëjnë vetë një shall të tillë duke ndjekur udhëzimet e dhëna nga mikja e tij (ju lutemi, kini parasysh që kjo lidhje shpie te një blog që strehohet te Blogspot; këshillohet marrja e masave të duhura paraprake (të tilla si përdorimi i një bllokuesi të JavaScript-it)). Lexuesit tanë të tjerë munden ose të mësojnë të thurin, ose të gjejnë dikë në gjendje t’u thurë një shall të tillë.

Dhuroni për Lirinë

Ky buletin nisi me një përmbledhje të shkurtër të veprimtarive vjetore që na presin muajt e ardhshëm. Kremtime të tilla, teksa janë zbavitëse dhe edukative, kanë nevojë për përpjekjet e ndërthurura të vullnetarëve tanë dhe ekipit tonë që të organizohen. Përveç kohës që lypin nga ekipi, veprimtaritë pjesë e kremtimeve lypin fonde. Më tej, veç kremtimeve zbavitëse, na duhen fonde për të vazhduar fushatat e hapura, për lobim në favor të Software-it të Lirë, për këshillim të programuesve lidhur me licencimet e Software-it të Lirë, dhe për njohjen e kompanive teknologjike me Software-in e Lirë dhe licenca të pajtueshme. Për fat të keq, nuk e kemi siguruar ende buxhetin tonë për 2014-n. Lexuesit tanë që mund të duan të përkrahin veprën tonë munden ose të bëjnë një dhurim, ose të bëhen Anëtarë Shok. I falënderojmë krejt dhuruesit dhe Anëtarët Shok ekzistues!

Një Vit të Ri të Lirë!
Heiki Ojasild - FSFE