Buletini i FSFE-së - qershor 2016
FSFE-ja nënshkroi letrën mbi asnjanësinë në rrjet
FSFE-ja tok me 72 organizma të tjerë, në negociatat në zhvillim e sipër për udhëzime lidhur me sendërtimin e Rregullatores së BE-së të sapomiratuar për periudhën 2015/2120, nënshkruan një letër për rregullatorët e telekomit në BE, në përkrahje të rregullave të forta për asnjanësinë në rrjet. Rregullatorja krijon bazën për një asnjanësi të fortë në rrjet, dhe FSFE-ja, tok me organizma të tjerë nga anembanë bota, i kërkon Grupit Europian të Rregullatorëve të Komunikimeve Elektronike (BEREC) dhe 28 rregullatorëve telekom kombëtarë t’i përkrahin këto rregulla dhe të vendosin udhëzime për asnjanësi të fortë në rrjet në Europë.
Nga kuptimi gabim i Software-it të Lirë, te software-i në CERN - FSFE-ja e zënë me veprimtari
Muaji i kaluar qe plot veprimtari dhe biseda, me praninë, në disa raste, të nëpunësve të FSFE-së dhe anëtarëve të ekipit të saj. Bisedat dhe prezantimet përfaqësojnë një pjesë të madhe të punës tonë për të mbërritur te njerëz nga shtresa të ndryshme dhe për t’u dhënë atyre mesazhin tonë.
Presidenti i FSFE-së, Matthias Kirschner, mbajti një fjalë të shkurtër gjatë Re:publica TEN, mbi se si të trajtohen kuptimet e gabuara të Software-it të Lirë. Ai mori pjesë edhe në Konferencën e Përdoruesve Kroatë të Linux-it, DORS / CLUC në Zagreb, Kroaci, ku mbajti fjalën rreth "Rrugës së gjatë të aftësimit të njerëzve për të kontrolluar teknologjinë".
Gjatë konferencës foss-north në Goteborg, Suedi, zëvendëspresidenti i FSFE-së, Alessandro Rubini, mbajti një fjalë rreth "Kohës në Software dhe Hardware - si trajtohet koha në kernelin e Linux-it dhe në rrjetin Lepuri i Bardhë në CERN", dhe drejtori i përgjithshëm i FSFE-së, Jonas Öberg, mbajti një fjalë rreth "Gjendjes së Software-it të Lirë në Europë (dhe gjetkë)".
Bashkërenduesi i ekipit gjerman, Max Mehl, mbajti një fjalë lidhur me Direktivën mbi 'Bllokimin' e Radiofrekuencave, gjatë veprimtarisë Wireless Battle of the Mesh v9, në Porto, Portugali, dhe redaktorja e buletinit tuaj, Polina Malaja, ofroi një përmbledhje rreth së njëjtës temë gjatë Wireless Community Weekend 2016 në Berlin, Gjermani.
Së fundi, por jo për nga rëndësia, bashkërenduesi i ekipit austriak të FSFEsë, Peter Bubestinger, mbajti një fjalë lidhur me Software-in e Lirë në shkolla, gjatë konferencës OSCAL - Open Source Conference Albania.
Nga bashkësia
Torsten Grote, në blogun e tij ofron një përmbledhje të risive më të reja nga fusha e sigurisë në shkëmbimin e atypëratyshëm të mesazheve, te "Briar - Hapi Pasues në Evolucionin e Mesazheve Me Fshehtëzim". Briar synon të bëhet programi për shkëmbim të atypëratyshëm të mesazheve peer-to-peer, i ndërtuar tërësish mbi Software të Lirë: ai përdor fshehtëzim nga-pika-në-pikë, me veçorinë forward secrecy dhe nuk kërkon prej përdoruesve të japin tejtëdhëna (përmbajtjen e librave të adresave dhe shpeshtinë e bisedave të tyre me kontaktet). Këto kritere do të ndihmojnë të ofrohet një program i sigurt, që mbron privatësinë, dhe që mund ta përdorë lirisht gjithkush.
Elena Grandi përshkroi përvojën e saj nga OpenPandora, një konsolë lojërash dhe kompjuter personal celular. Me këtë rast, Elena parashikon edhe pluset dhe minuset e pajisjes pasuese, Pyra.
Diderik van Wingerden shkroi në blogun e vet rreth perceptimit të tij të të ardhmes së risive dhe rolit të Software-it të Lirë në të, duke përpiluar edhe një listë të burimeve që e ndihmuan në "Formimin e një vizioni të së ardhmes".
Drejtori ynë i përgjithshëm, Jonas Öberg, shkroi mbi projektin Videorooter dhe testin e automatizuar të algoritmeve në të. Kodi tashmë është i lidhur me depot Github dhe testet e automatizuar të algoritmeve kryhen sa herë që dikush përmirëson kodin.
Björn Schießle ka lexuar kontratën e koalicionit të qeverisë së re në Baden-Württemberg, shtet i Gjermanisë, dhe analizoi se si premtojnë të promovojnë Software-in e Lirë (Në gjermanisht).
Christian Widerström hartoi një përmbledhje të veprimtarive të ardhshme në të cilat do të marrë pjesë ekipi austriak i FSFE-së (Në gjermanisht).
Projektit "Sustainable use of older laptops with Linux and Free Software", i zhvilluar kryesisht nga anëtari shok Wolf-Dieter Zimmermann, i është akorduar çmimi RWE Sustainability Award. Projekti i ndihmon njerëzit të migrojnë në Software-in e Lirë dhe të rivënë në përdorim hardware të vjetër përmes një instalimi të GNU/Linux-it (Në gjermanisht).
Ç’kemi bërë tjetër?
Si të bëhet me sukses fushatë për Software-in e Lirë, në një mënyrë që të jetë tërheqëse si për publikun e përgjithshëm, ashtu edhe për politikanët? FSFE-ja punoi tok me Peng! Collective dhe mësoi prej përvojës së kësaj të fundit në fushata, gjatë një praktike në fundjavë. Përfaqësuesi i Anëtarësisë Shok të FSFE-së, Mirko Boehm i përmblodhi përfundimet e praktikës në këtë postim blogu.
Ekipi austriak i FSFE-së bëri një punë të madhe duke qenë i pranishëm me stenda në Linuxwochen Wien dhe Grazer Linuxtage (në gjermanisht) dhe grupi vendor në Berlin qe i pranishëm në OpenTechSummit në Berlin, Gjermani.
Wolf-Dieter Zimmermann dha një intervistë rreth rëndësisë së Software-it të Lirë për Burimet e Hapura Edukative (Në gjermanisht).
Aktivizimi në Software-in e Lirë dhe kryerja e kësaj duke punuar për FSFE-në është gjithnjë e më tërheqës, dhe çdo muaj na kanë ardhur mjaft kërkesa për programin tonë të praktikantëve. Por shumica e kërkesave që marrin nuk i plotësojnë kushtet. Në një postim në blogun e vet, drejtori ynë i përgjithshëm, Jonas Öberg, jep disa këshilla se si të keni sukses me kërkesën tuaj për praktikant dhe të arrini të punoni në ekipin e FSFE-së si praktikant.
Hidhuni Në Veprim
Dilni vullnetar për mirëmbajtjen e platformës tonë të blogut! Nëse ju intereson fusha devops ose administrimi i sistemeve, ofrojmë një mundësi të përmirësoni aftësitë tuaja dhe të mësoni gjëra të reja gjatë administrimit të një platforme blogu për mijëra vullnetarët tanë!
Platforma e blogut FSFE është një shërbim që e ofrojmë për vullnetarët tanë, për t’u dhënë një hapësirë ku të shkruajnë mbi eksplorimin nga ana e tyre të Software-it të Lirë dhe punës së tyre në FSFE. Po bëhen ca kohë që shërbimi është në pikë të hallit dhe ka nevojë për t’u përmirësuar. Falë vullnetarëve të mrekullueshëm që ngritën dorën dhe ofruan ndihmën e tyre në mirëmbajtjen e platformës, shërbimi do të mbahet gjallë.
Nëse jeni të interesuar të bëheni pjesë e ekipit të platformës tonë të blogut, lidhuni me të, te blog-hackers (at) lists.fsfe.org.
Lajme të mira nga fusha e Software-it të Lirë
Qeveria hungareze botoi një dekret që promovon përdorimin e Software-it të Lirë dhe Standardeve të hapura në administratat publike. Ministrisë së Brendshme të vendit i kërkohet të krijojë një regjistër qendror licencash për software të përdorur nga sektori publik dhe të raportojë një herë në vit mbi përparimin e bërë në përdorimin e Software-it të Lirë dhe Standardeve të Hapura. Nga ana tjetër, Franca i rishikoi udhëzimet e veta për ndërveprueshmërinë, të cilat tani e tutje rekomandojnë ODF-në si një format standard komunikimi mes administratave publike dhe shtetasve. Sipas përditësimeve të strategjisë të planifikuara, që do të botohen në qershor, Agjencia e Sigurimeve Shoqërore në Suedi (Försäkringskassan) është e vendosur të vazhdojë me strategjinë e saj të Software-it të Lirë dhe të mbështesë vazhdimësinë e zgjidhjeve Software i Lirë që përdor. Siç nënvizon Agjencia e Sigurimeve Shoqërore, Software-i i Lirë e rrit në maksimum vlerën e TI-së duke lejuar përdorim të efektshëm të saj.
Falënderime për krejt vullnetarët , Anëtarët Shok dhe korporatat dhuruese që bëjnë të mundur punën tonë,
redaktorët tuaj, Polina Malaja dhe Erik Albers, FSFE