Buletin

Buletini i FSFE-së - korrik 2014

Kafe Privatësia: fshehtëzim email-esh si pjatë kryesore!

Përfytyroni se shkoni me disa shokë në kafe, por në vend pijesh të ftohta apo të nxehta, menuja përmban informacione mbi masa për sigurimin e privatësisë dixhitale. Si, për shembull, "https kudo"; si antipastë, "Fshehtëzim email-esh me GnuPG"; si pjatë kryesore, dhe "tosdr.org"; (informacione mbi kushte shërbimesh) si ëmbëlsirë. Kafe të tilla gjenden tashmë në Holandë. Në takimin e FSFE-së në Esen, Felix Stegerman, bashkërenduesi ynë prej Holande, paraqiti planet e tij për të krijuar më tepër kafe privatësie dhe shpejgoi se pse është i mendimit se është koha e duhur dhe një mundësi e mirë për Software-in e Lirë për ta bërë këtë edhe në vende të tjera.

Ndodh kështu sepse shumica e njerëzve që shkojnë në një kafe privatësie, janë tashmë në dijeni të problemeve rreth të privatësisë dhe lirisë. Në të njëjtën kohë, kjo u jep vullnetarëve vendorë një mundësi të mirë për të folur mbi Software-in e Lirë, dhe mbi rëndësinë e përdorimit të Software-it të lirë për çështje privatësie. Për shembull, duke u shtruar pjesëmarrësve pyetjen "kush e kontrollon software-in?" Lexoni postimin te blogu i Feliksit, për më tepër hollësi rreth këtyre kafeve dhe planeve për të ardhmen.

Vetëmbrojtja e email-it në gjuhë të ndryshme

Materialet e goditura, informuese mbi fshehtëzimin dhe Software-in e Lirë janë kyçe për privatësinë dhe kafetë e sapopërmendura. Fatmirësisht, organizmi ynë vëlla, FSF-ja, botoi udhërrëfyesin mbi vetëmbrojtjen në email dhe vullnetarët e kanë përkthyer udhërrëfyesin dhe grafikën në 6 gjuhë: Anglisht, Gjermanisht, Portugalisht Braziliane, Frëngjisht, Rusisht, Turqisht, dhe Japonisht. Ky udhërrëfyes shpjegon instalimin e programeve të nevojshme për fshehtëzim email-esh nën GNU/Linux, MacOS, dhe Microsoft Windows, si dhe prodhimin e kyçeve, rrjetin e besueshmërisë dhe përdorimin e këtyre programeve. Krejt çka ju duhet është një kompjuter me lidhje në Internet, një llogari email, dhe afërsisht një gjysmë ore. Për më tepër të dhëna se si mund të ndihmoni të përhapet informacioni rreth vetëmbrojtjes në email, shihni ndarjen "aktivizohuni" të këtij numri të buletinit.

Çfarë të përdoret në vend të WhatsApp-it dhe Threema-s?

"Si t’i fshehtëzoj email-et e mia" ka qenë një nga pyetjet më të rëndomta që kemi marrë muajt e fundit. Falë udhërrëfyesit mbi vetëmbrojtjen në email, tani kemi një përgjigje të kënaqshme. Një tjetër pyetje rreth fshehtëzimit dhe privatësisë, që na është bërë shpesh, ka qenë: "a ka një alternativë të sigurt dhe të lirë për WhatsApp-in?"

WhatsApp është një program shkëmbimi mesazhesh, për pajisje celulare, që ju lejon të dërgoni mesazhe (tekst) pa pagesë. Pas blerjes tani së fundi të WhatsApp-it nga Facebook-u dhe nën dritën e zbulimeve mbi NSA-në, mjaft nga përdoruesit e WhatsApp-it po kërkojnë për alternativa të sigurta dhe të besueshme.

Ngaqë kjo prek kaq shumë vetë, ne të Free Software Foundation Europe-s do të donim të ishim në gjendje të promovojmë një alternativë që respekton lirinë dhe privatësinë tuaj. Ndaj, në takimin tonë të fundit të ekipit të FSFE-së në Esen, vendosëm të bëjmë ca kërkime dhe të organizojmë një praktikë mbi alternativa WhatsApp-i. Përfundimet e takimit u përmblodhën nga Hannes Hauswedell dhe Torsten Grote.

Diçka krejt tjetër

• Veprimtari grupesh vendore: FSFE-ja qe e pranishme me stenda në qiell të hapur në festivalin veror të veganizmit në Vjenë, si dhe në Corso Leopold në Mynih. Në takimin mbi Software-in e Lirë në Athinë, grupi ynë vendor i FSFE-së diskutoi se si të krijohet një shërbyes për përdorim vetjak. Nikos Roussos dokumenton hapat si të rregullohet një shërbyes i tillë me Fedora dhe Beagle Bone Black. Grupi ynë në Frankfurt u përqendrua në tema shifrimi, dhe Hugo Roy, bashkërendues i grupit vendor të Parisit, mbajti një bisedë në një veprimtari vendore mbi Ubuntu-në.
• "Software-i i Lirë ka nevojë për një bashkësi të fortë. Nëse nuk ia dalim të tërheqim këdo që dëshiron të punojë për Software-in e Lirë, i bëjmë dëm vetes." shkroi Karsten Gerloff në postimin në blogun e tij "Katër rregulla shoqërore për një 'No Asshole Zone'". Bashkërenduesit e grupeve tona vendore kanë shprehur ide të ngjashme, dhe ia filluan punës me një kod sjelljeje për diskutimet e FSFE-së. Presim përshtypjet tuaja.
• Bashkësia e Software-it të Lirë tani ka 33 përkrahës në Parlamentin Europian. Të tërë ata kanë nënshkruar paktin e Software-it të Lirë për zgjedhjet Europiane, dhe jemi të sigurt se do të vijë koha për t’u kujtuar atyre premtimet që kanë bërë, dhe për t’u kërkuar të përkrahin kauzën tonë.
• Presidenti ynë, Karsten Gerloff mbajti një fjalë në Konferencën e Krishterë Europiane mbi Internetin. Pas saj, iu kërkua nga një prift të komentonte rreth një strategjie paraprake për t’i kaluar kishat e zonës së tij nën Software të Lirë, kërkesë së cilës Karsteni iu përgjigj.
• Nga 7 deri më 8 qershor 2014, Fundația Ceata, një organizëm i përshoqëruar me FSFE-në, organizoi konferencën e dytë Coliberator në Bukuresht. Në të parën, fjala kryesore u mbajt nga presidenti i FSFE-së, Karsten Gerloff, kurse në këtë herë të dytë, nga Richard Stallman, president i FSF-së. Pjesa e parë e bisedave është botuar tashmë në sajtin e konferencës.
• Guido Arnold sjell lajmet mbi Software-in e Lirë në arsim - maj 2014.
• Administrata publike: Prej Joinup-it njoftohet se koklavitjet te licencat e software-it pronësor po nxisin përthithjen e Software-it të lirë nga Greater London Authority, se shërbimi shëndetësor në rajonin e Ekstremaduras ka kaluar nën Software të Lirë, dhe se qyteti gjerman i Lajpcigut ka kaluar tashmë 2792 nga 4300 kompjuterët e administratës nën suita zyrash Software të Lirë, Apache OpenOffice dhe LibreOffice. Prej kësaj lëvizjeje presin që "për pesë vjetët e parë kursimet e pritshme do të gëlltiten nga kostot e lidhura me braktisjen e software-it pronësor të përdorur nga administrata e qytetit."
• Nga grumbullimet planet:
• Më tepër diskutuese femra në konferencë dhe ATM që punojnë nën GNU/Linux. Torsteni mbajti një bisedë mbi fushatën Çlironi Androidin Tuaj në FISL, Brazil?
• Nën sloganin "të dhënat tuaja në shërbimet agjenturore" German Humanistische Union organizoi një "blog parade", duke u kërkuar organizmave pjesëmarrje me një postim blogu. Erik Albers-i shkroi postimin "Mbrojtje kundër survejimit përmes fshehtëzimit me Software të Lirë" (në Gjermanisht).
• Takimet Randa, një varg takimesh pune për ta bërë software-in KDE më të mirë lypin ndihmën tuaj për këtë vit. Mario Fux i kërkon kujtdo të përhapë lajmin, ndihmojë, dhurojë dhe/ose t’i përkrahë ata.
• Hugo Roy paraqet disa "mjete të shkëlqyera" që ai përdor, por që pak njihen.
• Bdale Garbee shkroi rreth TeleGPS-së, një pajisje elektronike, e lehtë për t’u përdorur, që ofron lokalizim përmes GPS-je, vetëm gjurmim.
• Fotografi: Hanesi filloi të botojë foton e muajit, të përpunuar me software-in e lirë Darktable, ndërsa Paul Boddie shpjegon se si rregulloi paraparjet e fotove në digiKam.
• Björn Schießle përshkruan si të integrohet në Claws Mail software-i për lista punësh "ToDo.txt".
• Ish-punonjësi i FSFE-së, Sam Tuke, shpjegon se si të kopjeruhen vetvetiu llogari të shumta email në GNU/Linux.

Përfshihuni: Përhapni udhërrëfyesin mbi vetëmbrojtjen në email!

Udhërrëfyesi i FSF-së mbi vetëmbrojtjen në email dhe grafika përkatëse janë një material i mirë për t’i shpjeguar publikut të gjerë fshehtëzimin e email-it. Gjatë ca kohe, FSFE-ja u furnizon veprimtarëve materiale informative mbi Software-in e Lirë. Veç informacionesh të përgjithshme mbi Software-in e Lirë, Standardet e Hapura, Administrimin Dixhital të Kufizimeve, ose F-Droid-in, do të donim të shpërndanim në të ardhmen edhe grafikën e sipërpërmendur.

Përpara se të japim në shtyp një sasi më të madhe dhe t’ua dërgojmë atë grupeve tona vendore dhe veprimtarëve të tjerë nëpër Europë, do të donim t’i vinit në provë grafikat, me miqtë, familjen dhe kolegët. Shihni nëse kanë probleme me të kuptuarit e disa pjesëve dhe përdorni listat tona të diskutimeve publike, që kështu ne - tok me organizmin tonë vëlla - të mund t’i përshtatim ato, në qoftë e nevojshme.

Falënderojmë krejt vullnetarët, Anëtarët Shok dhe korporatat dhuruese që bëjnë të mundur punën tonë,
Matthias Kirschner - FSFE