Buletini i FSFE-së - shtator 2016

më 2016-09

Fjalë nga redaktorët tuaj

Faleminderit për ndihmesën për ta bërë Kuvendin e FSFE-së javën e kaluar një sukses shumë të madh! Qemë të ngazëllyer se do të shihnim kaq shumë fytyra familjare dhe presim me padurim të takohemi sërish me ju. Sigurisht që Kuvendi i FSFE-së s’qe gjëja e vetme muajin e shkuar. Në këtë buletin mund të lexoni mbi veprimtari të tjera të bashkësisë sonë. Në buletinin e tetorit do të japim një pasqyrë më të gjerë mbi zhvillimet e Kuvendit. Na prisni!

The FSFE's 15 years

Këtë vit kremtojmë 15-vjetorin tonë dhe kulmimi i kremtimit zyrtar ndodhi gjatë Kuvendit të FSFE-së, nga 1-4 shtator. Por ky kremtim do të duhej të vazhdonte gjatë gjithë vitit: le t’i përdorim javët dhe muajt e ardhshëm për të nxjerrë në pah 15 vjet të ekzistencës tonë, dhe ta përdorim këtë mundësi për të përhapur fjalën për software-in e lirë dhe punën tonë. Le të nxjerrim në pah arritjet më të mëdha, le të kujtojmë histori personale dhe t’i ndajmë ato me të tjerë përmes postimesh blogu, mediash shoqërore, listash postimi, bisedash, dhe në rrugë të tjera.

Që të merrni pak frymëzim se si mund të kontribuoni, jeni të mirëpritur të vizitoni faqen tonë wiki, te e cila do të gjeni shembuj dhe ndihmë se si të kontribuoni. Një pjesë e punës që kemi bërë gjatë 15 vjetëve të shkuar është e pranishme te rrjedha kohore e ripunuar e FSFE-së.

Një nga arritjet e fundit ka qenë krijimi nga ne i videos së FSFE-së për kremtimin e ditëlindjes sonë. Kjo video ka titra në jo më pak se 12 gjuhë, falë përkthyesve tanë vullnetarë të mahnitshëm. Hidhini një sy edhe ngjitësit tonë të ri të 15-vjetorit, që mund ta porositni nga ne për të na ndihmuar të përhapim fjalën, dhe jo vetëm për vete.

Nga bashkësia

Falë përkthyesve tanë (përmendur tani për herë të dytë në këtë buletin!), jemi në gjendje të mbërrijmë në një publik të gjerë në shumë gjuhë! Ndihma e përkthyesve tanë është kyçe për ndikimin tonë. Përkthyesi frëng Julien Pivotto e ka përmirësuar procesin ekzistues të përkthimit për ta bërë më të efektshëm dhe më të hapur. Ai ka shkruar një propozim për të ndryshuar konceptin kryesor të procesit. Cryptie dhe André Ockers mbajtën një sesion rreth kësaj gjatë kuvendit.
Paul Boddie shkroi në blog mbi fushatën EOMA68 dhe mbi kritika të saj. Fushata EOMA68 më pas ia arriti të plotësojë me sukses mbledhjen e financimit dhe tani do të hidhet në prodhim.
André Ockers gjithashtu i bindi autoritetet holandeze të heqin reklama për lexues jo të lirë PDF-sh nga sajti zyrtar Digid.nl i përdorur për të hyrë në shumicën e shërbimeve publike në Holandë.
Matthias Kirschner shkroi në blog rreth një mënyre për të ujdisur një zgjidhje paksa më të sigurt për transaksione bankare që nga shtëpia, duke e xhiruar ndaras nga shfletuesi juaj i përditshëm shfletuesin që përdorni për transaksione. Në një postim tjetër, ai shkroi një përmbledhje të aspekteve pozitive të Software-it të Lirë të përfshirë në pozicionet e partive, për zgjedhjet e ardhshme në Berlin.
Jonas Öberg shkroi rreth regjistrimit të grupit të FSFE-së me rrjetin IRC Freenode, çka bën të mundur që të kërkohen mantele përshoqërimi me FSFE-në. Ai shkroi gjithashtu rreth përvojës së vet për t’i bërë titrat të funksionojnë me videon tonë të FSFE-së duke përdorur WebVTT.

Ç’kemi bërë tjetër?

FSFE-ja u bë anëtare e trupës këshillimore të fondacionit Document Foundation, ndërsa Document Foundation u bë organizëm i asociuar i FSFE-së. Me këtë shprehje të dyanshme të përkrahjes, të dy organizmat do të forcojnë njëri-tjetrin në objektivin e tyre të përbashkët të mbajtjes së publikut të përgjithshëm në vendin e drejtuesit në fushën e teknologjisë.
Erik Grun dhe Erik Albers u rreshtuan në emër të FSFE-së me disa organizma të tjerë për të xhiruar një fushatë Pyetni kandidatin tuaj të quajtur "Wahlprüfsteine". Pyetjet u janë dërguar shumicës së partive pjesëmarrëse në zgjedhjet e ardhshme në Mecklenburg Vorpommern dhe Berlin. Përgjigjet prej tyre u analizuan dhe u botuan për publikun votues.
Që prej 1 gushtit, falë një ligji të ri gjerman, nëse jeni klient i një furnizuesi gjerman shërbimi internet, gëzoni të drejtën të përdorni një rrugëzues alternativ, më e mira do të ishte një që xhiron nën Software të Lirë. Ju lutemi, na dërgoni përshtypjet tuaja nëse patët probleme me xhirimin e një rrugëzuesi të ri dhe na ndihmoni t’i grumbullojmë te faqja jonë wiki. Në rast se nuk keni ndonjë pajisje alternative, bashkërenduesi i FSFE-së për Gjermaninë, Max Mehl u ka dërguar tashmë rrugëzuesit e parë me Software të Lirë vullnetarëve për testim dhe mund të furnizojmë edhe të tjerë.
FSFE-ja qe e pranishme në FrOSCon 2016, në Sankt Augustin, ku analistja jonë e politikave dhe bashkërenduesja për çështje ligjore, Polina Malaja mbajti një fjalë rreth "DSM, EIF, RED: Akronime në nivel BE-je dhe pse kanë rëndësi për lirinë e software-it" (në Anglisht), ndërsa bashkërenduesi për Gjermaninë, Coordinator Max Mehl mbajti një fjalë "Routerzwang und Funkabschottung – Was Aktivisten davon lernen können" (në gjermanisht). Max shkroi në blog mbi përvojën e tij me konferencën, duke përfshirë në shkrim edhe lidhje për te incizimet e të dyja bisedave.

Hidhuni në veprim!

Për pesëmbëdhjetëvjetorin tonë (siç e shihni, këtë muaj po merremi shumë me këtë), po organizojmë fushatën "Njihuni me heroin tuaj vendor të Software-it të Lirë". Ideja është të lidhen anëtarët e bashkësive tona vendore me shtypin vendor atje ku banojnë. Heronjtë tanë vendorë shpjegojnë se si i prek njerëzit Software-i i Lirë në zonën e tyre, të mirat e tij për arsimin, sistemin shëndetësor, ekonominë vendore dhe jetën e përditshme të shtetasve. Nëse jeni një gazetar, blogtar, vlogtar, podcaster, ose çfarëdo tjetër që mund të na ndihmojë të lidhemi me një degë të medias, ju lutemi, lidhuni me ne dhe do t’ju tregojmë se cilët janë heronjtë vendorë për ju dhe si të lidheni me ta.

Lajme të tjera nga Software-i i Lirë

Policia lituaneze migroi mbi 8000 kompjuter nga Microsoft Office në LibreOffice. Qeveria holandeze në planin e vet Digital Agenda për 2016-2017 po sheh mundësinë për t’i bërë Standardet e Hapura të detyrueshëm për administratat publike, me synimin që bizneseve dhe shtetasve t’u jepen rrugë më të lehta për te shërbimet e-qeveri. Qyteti i Valencias (Spanjë) po ripërdor Epoptes, një software për administrim laboratorësh PC në shkolla, i krijuar si software i lirë që nga 2008 në Greqi. Software-i është përmirësuar nga anëtarë të degës TI të bashkisë së qytetit, të cilët e japin kodin e tyre publikisht.

FSFE-ja në Shtyp

Me rastin e 15-vjetori të saj, FSFE-ja është trajtuar në shtyp lidhur me një numër temash. Ja disa nga këta artikuj, për lexim të mëtejshëm:

[EN] nga William New, Matthias citohet nga një artikull në Intellectual Property Watch mbi se si Politika e Re e Qeverisë së ShBA-ve Për Kodin Burim Mund të Shërbejë Si Model Për Europën.
[IT] [EN] nga Sonia Montegiove, Tech Economy, Përkrahni lirinë dixhitale me FSFE-në: një intervistë e dyfishtë me Matthias Kirschner-in dhe Alessandro Rubini-n.
[DE] [AT] nga Patrick Dax, Future zone, Shqetësime lidhur me kufizimet e software-it të rrugëzuesve alternativë . Në këtë artikull, ka një referencë ndaj fushatës së FSFE-së kundër rrugëzuesve të detyruar.
[EN] nga Paul Brown, opensource.com, Kuvendi i parë i FSFE kremton sukseset e software-it të lirë.
[DE] nga Hans-Joachim Baader, pro-linux.de, FSFE-ja krahason pozicionet e partive lidhur me Software-in e Lirë për zgjedhjet në Mecklenburg-Vorpommern.
[DE] nga Mirko Lindner, pro-linux.de, FSFE und TDF arbeiten enger zusammen.
[EN] nga Paul Brown, LiNUX.com, Kuvendi i parë i FSFE-së Do të Përqendrohet në Çështje dhe Strategji Sociale.
[DE] nga Jan Raehm, Deutschlandfunk, Programe kompjuterikë pa kufizime - beteja për software-in e lirë.

Falënderojmë krejt vullnetarët, anëtarët shok dhe korporatat dhuruese që bëjnë të mundur punën tonë,

redaktorët tuaj Polina Malaja, Erik Albers, Olga Gkotsopoulou dhe Jonas Öberg, FSFE