Buletin

Buletini i FSFE-së - tetor 2014

Një gjykatë italiane përkrah shitjen veçmas, jo si paketë më vete, të software-it dhe hardware-it

Kur blihet një laptop, mund të jetë e vështirë të shmanget pagesa e një licence Microsoft Windows, ngaqë mjaft prej laptopëve shiten me një të tillë brenda paketës. Kjo “Taksë Windows” i rrit artificialisht çmimet e hardware-it për përdoruesit e Software-it të Lirë që nuk duan të përdorin sistem operativ të Microsoft-it. Ne, si përdorues të Software-it të Lirë, duam të përkrahim zhvillimin e Software-it të Lirë, në vend se të atij jo të lirë, të llojit Microsoft Windows.

Që prej 2008-s kujdesemi për një faqe wiki me këshilla për konsumatorët që duan të shmangin financimin e zhvillimit të software-it jo të lirë, dhe për më shumë se një dhjetëvjeçar kemi biseduar rreth kësaj teme me politikanë dhe organizma të mbrojtjes së konsumatorit. Pavarësisht kësaj, lidhur me temën ka vetëm përparim të ngadaltë, dhe do të duhen vite që të ndryshojë kjo gjendje në Europë. Për synime të tilla afatgjata, kapja e objektivave afatmesme është e rëndësishme. Një fitore të tilla e patëm muajin e fundit.

Gjykata e Lartë e Italisë vendosi që blerësi i një laptopi ka të drejtën të rimbursohet me çmimin e licencës për Microsoft Windows të cilën qe i detyruar ta blinte tok me kompjuterin. Gjykatësit kritikuan ashpër praktikën e shitjes së PC-ve vetëm tok me një sistem operativ jo të lirë, duk e cilësuar “politikë tregtare e shpërndarjes së detyruar”. Gjykata e konsideroi këtë praktikë si “me prirje monopoliste”. Ajo theksoi gjithashtu se praktika e shitjes bashkë nënkupton që përdoruesi i rëndomtë është i detyruar të përdorë aplikacione shtesë jo të lira, për shkak problemesh përputhshmërie dhe ndërpunueshmërie, do apo nuk do ai.

Tani autoriteteve italiane u duhet ta shndërrojnë këtë vendim në një fitore reale për konsumatorët, duke bërë të mundur që blerësit e kompjuterave të mund të zgjedhin pajisjen e tyre me çfarëdo sistemi operativ që duan, ose pa një të tillë. Pas kësaj, shpresojmë të arrijmë të bindim vende të tjera në Europë të ndjekin shembullin e dhënë nga Italia, ose të gjejmë një zgjidhje të problemit në shkallë europiane.

Administrata publike europiane që përdorin Software-in e Lirë

Shpesh ka një prirje në media, dhe edhe prej nesh, të përqendrohemi në lajmet e këqija rreth përdorimit të Software-it të Lirë në administratën publike. Në këtë edicion, do të përqendrohemi në shembuj të mirë nga muaji i fundit. Atëherë, ka lajme të mira lidhur me suita zyrash Software të Lirë: Bundesrechenzentrum-i i Austrisë, qendra e kompjuterit pronë e qeverisë federale, lëvdon gamën e gjerë të zbatimeve të Apache OpenOffice-it. Ata vlerësojnë faktin që “zgjidhja mund të përshtatet për nevojat e qendrave të të dhënave, të integrohet në aplikacionet e tyre të specializuara, dhe se lejon gjithashtu që dokumentet të krijohen dhe parashtrohen vetvetiu dhe gjysmë-vetvetiu. OpenOffice është suita standarde për zyra në qendrën e kompjuterit që prej 2008, e instaluar në 12000 PC në krejt organizmin.” Për më tepër, administratat publike të qyteteve italiane të Todit dhe Ternit po kalojnë në LibreOffice. Ata po ndjekin shembullin e provincës italiane të Peruxhias, që përdor LibreOffice në krejt 1200 PC-të e saj dhe të Autoritetit Vendor të Shëndetit për Peruxhian, që suitën për zyra e ka instaluar në 600 PC.

Administrata publike frënge po përdor një suitë zyrash nga Software-i i Lirë në 500 000 desktopë. Edhe pse thanë se kalimi në Software-in e Lirë qe i vështirë, qenë në gjendje t’i zgjidhnin problemet. Suksesi i projektit i detyrohet pjesërisht dy kontratave që ministritë kanë lidhur me mundësues shërbimesh ICT. Kontratat mbulojnë asistencë për 260 aplikacione Software-i të Lirës, dhe ekipi i asistencës garanton që arnimet e bëra për ministritë të jepen te projektet përkatës të software-it.

Të gjelbrit në Saksoni/Gjermani i kërkojnë qeverisë federale të kryejë një studim fizibiliteti mbi migrimin në Software të Lirë. “Grupi politik, me vetë ata si përdorues të software-it të lirë që prej dhjetorit të 2011-s, thotë se kosto më të ulëta në sektorin TI dhe përparësitë në sigurinë TI do të duhej ta shtynin administratën publike” drejt përdorimit të Software-it të Lirë. Ata mbrojnë pikëpamjen se varësia nga software-i pronësor “u jep korporatave të mëdha akses dhe ndikim në rrjedhat e brendshme zyrtare të punë, si edhe në komunikime dhe të dhëna jopublike të shtetasve të një vendi.”

Diçka krejt tjetër

• Edhe pa taksën Windows të përmendur më sipër, ende ju duhet të gjeni nëse kompjuteri që dëshironi të blini funksionon nën Software të Lirë. Për të përmirësuar informacionin se cili hardware është i përputhshëm, FSF-ja dhe Debian tani bashkëpunojnë në zgjerimin dhe thellimin e bazës së të dhënave mbi hardware-in, h-node për t’i ndihmuar përdoruesit të njohin dhe ndajnë me të tjerët informacione rreth kompjuterësh që punojnë me sisteme operativë nga Software-i i Lirë.
• Te lista jonë publike e postimeve, në Anglisht, po zhvillohet një diskutim rreth metaforash të goditura për Software-in e Lirë. Hugo Roy e filloi rrjedhën me disa shembuj. Alessandro Rubini bëri disa vërejtje kritike, duke dalë kundër metaforave të përmendura. Sipas tij, nëse na duhet një metaforë që u shpjegon Software-in e Lirë njerëzve, na duhet të qëndrojmë në truallin e informacionit, e dijes që mund të përhapet pa kosto. Në një postim tani së fundi, Guido Arnold-i njoftoi për rezultate të mira ndër fëmijë nga përdorimi i analogjisë me recetat e gatimit.
• Në Ditën e Lirisë së Software-it për këtë vit u përfshinë disa grupe vendorë FSFE: Edgar Hoffmann organizoi një stendë informacioni përballë bashkisë në Offenburg, dhe në mbrëmje një mini-konferencë për bashkësinë, me biseda dhe konkursin tonë për Software-in e Lirë (ne Gjermanisht, por plot me fotografi). Dominic Hopf, bashkërenduesi ynë për Hamburgun, mbajti një fjalë rreth F-Droid-it, në veprimtarinë e DLS-së në Kiel, ndërsa Torsten Grote i njohu njerëzit me F-Droid-in gjatë një veprimtarie për DLS-në në Berlin. Të pranishëm në këtë veprimtari qenë Nermin Canik-u nga Stambolli dhe redaktori i këtij buletini, për të biseduar me njerëzit rreth lirisë në fushën e software-it. Më tej, Michael Stehmann mbajti një fjalë rreth Software-it të Lirë dhe privatësisë, në një veprimtari për DLS-në në Këln (në Gjermanisht).
• Nga 13 deri më 15 tetor, FSFE-ja do të ketë një stendë në Linuxcon në Dyselforf. Meqë mjaft veprimtarë të Software-it të Lirë do të jenë të pranishëm që më parë, grupi ynë i Anëtarëve Shok nga Dyseldorfi i fton krejt përkrahësit e Software-it të Lirë në banketin e 10 tetorit 2014, duke filluar nga ora 11:00 am, në bistronë "Schwesterherz", Bilker Allee 66, 40219 Dyseldorf. Pra, kohë shumë aktive për grupin tonë vendor të atjeshëm, pas pjesëmarrjes në një veprimtari mbi kriptografinë, për Komisionerin e Mbrojtjes së të Dhënave dhe Lirisë së Informacionit (në Gjermanisht) dhe organizimit të një stende në festivalin e rrugës Zackk (në Gjermanisht).
• Guido Arnold përmbledh përfundimet e praktikës së FSFE-së në Esen, gjatë të cilës ne diskutuam mbi praktikat më të mira për zhvillimin e veprimtarive përkrahëse në shkallë vendore.
• Zhvilluesi i Software-it të Lirë, Matthew Garret, është “patundshmërisht i bindur se Software-i i Lirë që nuk bën asgjë për të respektuar apo fuqizuar përdoruesit është humbje absolute kohe”. Në blogun e tij ai mbron idenë se na duhet të hartojmë software që nga zeroja, në mënyrë të tillë që këto liri të furnizojnë përfitime të menjëhershme dhe të njëmendta për përdoruesit tanë. Sipas tij, gjithçka tjetër përbën një dështim.
• Nga grumbullimet planet:
• Guido Arnold raporton nga praktikat Teckids në FrOSCon9. Më tepër se 60 fëmijë, nga 9 deri 13 vjeç, morën pjesë në tri praktika të ndryshme mbi robotët, lojëra të shkruara me Python dhe Blenderin.
• Max Mehl shpjegon si të përdoret Openstreetmap si parazgjedhje për kontaktet në Thunderbird dhe si të përdoren kontaktet për datëlindjet në ownCloud përmes një kalendari CalDAV.
• Henri Bergius raporton lidhur me gjendjen e mjedisit NoFlo për zhvillime, një ndërfaqe përdoruesi për programime në Flow.
• Ka disa hapa që mund të ndërmerrni për të shmangur pasjen punë me kartela Microsoft Office. Sidoqoftë, në disa raste do të jeni të detyruar të merreni me to. Kevin Keijzer dokumenton hapat se si të përfitoni maksimumin nga kartela Microsoft Office si përdoruesi Software-i të Lirë.
• Stazhieri ynë i tanishëm, Michele Marrali, shkroi një postim blogu rreth se si patentat, të drejtat e kopjimit dhe shenjat tregtare mund të përdoren për të promovuar lirinë në projekte hardware-i.

Aktivizohuni: Jepni mendimin tuaj rreth Manifestit mbi të Dhënat e Përdoruesit

Është hedhur në qarkullim versioni 2 i Manifestit mbi të Dhënat e Përdoruesit. Synimi i këtij manifesti është të përkufizojë të drejtat themelore të përdoruesve mbi të dhënat e tyre në epokën e Internetit: të kontrollojnë aksesin në të dhënat e tyre (dhe tejtëdhënat), të dinë si dhe ku ruhen të dhënat dhe të jenë të lirë të zgjedhin një platformë. Disa projekte po punojnë tashmë për përkrahjen e manifestit, për t’u dhënë përdoruesve të tyre këto të drejta! Tani për tani, versioni 2 është i botuar si draft në një wiki që lejon komente publike.

U kërkojmë krejt përkrahësve të Software-it të Lirë të japin mendimin e tyre mbi manifestin, që të mund të përmirësohet më tej, dhe të mundemi të vendosim nëse ne si FSFE duam ta përkrahim. Ju lutemi, jepni mendimin tuaj ju vetë, diskutojeni manifestin në listat tonë të diskutimeve, dhe kërkojuni mendimin organizmave të tjerë të Software-it të Lirë dhe edhe nëse do ta përkrahnin në këtë formë.

Falënderime për krejt vullnetarët, Anëtarët Shok dhe korporatat dhuruese që bëjnë të mundur punën tonë,
Matthias Kirschner - FSFE